BURT MEÐ VALKVÍÐANN! BÖNNUM SÉRVERSLANIR!

Aðgangur að ódýrum glussa allan sólarhringinn í staðinn fyrir þetta endalausa úrval frá 9-18

Sniðug hugmynd að banna allar þessar sérverslanir sem hafa eingöngu alskonar áfengistegundir á boðstólum en eru bara opnar á daginn og selja bara nóg af léttvínsbeljum, vinsælustu bjórtegundum og búsi í stórmörkuðum sem eru opnir allan sólarhringinn.

Auðvitað gætu stórverslanir ekki boðið upp á allar þessar endalaust mörgu sortir því að eitthvað pláss þarf að vera fyrir eitthvað annað en brennsann þótt hann sé góður, en það væri hægt að hafa þarna tvær þrjár tegundir af bjór og helstu léttvínsbeljurnar og svo einhvern gaddavírsvodka kannski og hugsanlega gin og konjak og eitthvert dísætt líkjörasull til málamynda. Og kannski litlar flöskur af Unterberg afréttara við kassann.

Spurningin er þá úr því að það er svona hagkvæmt að loka fyrir sérverslanir með áfengi hvort ekki er löngu tímabært að banna einfaldlega allar sérverslanir, ekki bara sérhæfðar áfengisverslanir heldur líka bókabúðir, skóbúðir, leikfangaverslanir, tölvuverslanir og svo framvegis til að ná því fram að allir versli eingöngu vinsælustu merkin í stórmörkuðum sem væru þá opnir allan sólarhringinn svo að maður geti keypt sér tölvur og bílavarahluti á nóttunni sem mundi auka frelsi og bæta þjónustu til muna?

Færri sortir mundi líka losa fyllibytturnar við þann valkvíða og stress sem getur fylgt því að fara í Ríkið og þurfa að velja úr þessum endalausu sortum af víni frá öllum heimshornum þegar maður er bara að leita að einhverjum ódýrum glussa til að skola humarnum niður og ná því að verða þægilega dofinn til að komast gegnum nóttina.

Svo að það náttúrulega líka stórsniðugt að sjá til þess að gróðinn af áfengissölu lendi hjá einkaaðilum en kostnaður vegna áfengismeðferðar, sjúkdóma og afbrota lendi á Ríkinu – og fíflunum sem ennþá borga skatta.

Þér gæti einnig líkað við
Ummæli
Hleð...