Forsögulegar skrímslaleifar við Hvaleyrarvatn

Vísindahundurinn Theobald finnur líkamsleifar risavatnaskjaldböku-unga við vatnið

Mig hefur lengi grunað að skrímsli frá forsögulegum tíma eigi heima í djúpum Hvaleyrarvatns og í morgun gekk vísindahundurinn Theobald fram á jarðneskar leifar af einhverri skepnu sem í fyrstunni virtist geta verið fjörulalli.

Við nánari athugun og hafandi gert nákvæmt lyktarpróf á fundinum telur Theobald að hér gæti verið um að ræða skjöld af risavatnaskjaldböku-unga sem fullvaxnir eru ofurlítið minni en risa-apinn, King Kong, en tvöfalt stærri en ókindin í Loch Ness-vatni í Skotlandi og grimmari en fjandinn sjálfur.

Ekki var auðvelt að sjá hvað hefur orðið litla skrímsla-unganum að fjörtjóni. Beinagrindin er horfin innan úr skildinum, en afarsjaldgæft er að sómakærar skjaldbökur fari á kreik kviknaktar án yfirhafnar.

Theobald lét sér detta í hug að skátar sem nýlega voru í útilegu þarna við vatnið gætu hafa rekist á ungann og talið þetta vera íslenska flatböku. Síðan hafi skátarnir – í góðri trú – grillað ókindina yfir varðeldinum og sungið síngang gúllígúllí (vassan ging gang gú) áður en þeir átu innan úr skelinni sem er ekki með öllu hættulaust því að svokallað nóró-afbrigði af risavatnaskjaldbökum getur farið illa í maga.

Þér gæti einnig líkað við
Ummæli
Hleð...