SAMTÖK UM BETRI BÍL HANDA SAMGÖNGURÁÐHERRA

Krefjast þess að ráðherrann fái Gurkha-torfærutröll með hvalveiðiskutul á þakinu sem mundi gera ráðherranum kleift að stunda hvalveiðar af landi

Fátt sýnir betur smásálarskap Íslinga en hin samansaumaða umræða um ráðherrabíla sem fer af stað við hver stjórnarskipti, rétt eins og fólk geri sér ekki grein fyrir að ráðherrar þurfa bæði ráðherrastóla og ráðherrabíla til að sýna veldi sitt á sama hátt og enginn getur verið kóngur án þess að hafa aðgang að góðu hásæti og fallegri kórónu.

Ódýrari gerðin af Gurkha-torfærutröllinu kemur líka til greina, en hún hefur ekki hvalveiðiskutul á þakinu og aðgerðastýrið er úr plasti en ekki rostungstönn og sætin nælonklædd en ekki úr selskinni eins og á de lux týpunni.
Hér sést samgönguráðherra Rúrítaníu búa sig undir að stíga upp í sinn ráðherra(pall)bíl á leið í kjördæmið þar sem allt er rennslétt og malbikað.

Sérstaklega er óviðkunnanleg umræðan um okkar góða samgönguráðherra Jón Gunnarsson sem virðist ætla að láta bjóða sér skitinn slyddujeppa af Toyota-gerð í stað þess að kaupa almennilegt torfærutæki á borð við Gurkha Armored Tactical Vehicle frá kanadíska fyrirtækinu Terradyne Armored Vehicles sem nú eru loksins fáanlegir á almennum markaði.

Rætt hefur verið um að stofna samtök stuðningsmanna samgönguráðherra hérna í kjördæmi hans og krefjast þess að Toyotan verði sett á bílasölu og í staðinn fái ráðherra Gurkha-torfærutröll af dýrustu gerð, þessa sem er með hvalveiðiskutul á þakinu, þannig að ráðherrann gæti stundað hvalveiðar af landi í stopulum tómstundum sínum.

Það gefur augaleið að í landi þar sem vegir eru sjaldnast í góðu ástandi þurfa samgönguráðherrar að vera á betri bílum til að komast leiðar sinnar en kollegar þeirra í löndum þar sem allir vegir eru malbikaðir og rennsléttir.

Það er leiðinlegt að þjóðin skuli einskis meta þá auðmýkt ráðherra að láta sér yfirleitt duga fjöldaframleidda slyddujeppa til að komast leiðar sinnar í stað þess að fara fram á hraðskreiðar alvörubifreiðar því að tími hvers ráðherra er dýrmætur.

Hraðskreiður bíll eins og Koenigsegg á tæpar fimm milljónir dollara gæti sparað önnum köfnum ráðherrum talsverðan tíma.
Þessi Ferrari Pinfarina Sergio gæti verið mjög sportlegt farartæki fyrir ungan einhleypan ráðherra (karl eða konu að sjálfsögðu).
Þér gæti einnig líkað við
Ummæli
Hleð...