Fegurðargjald í Fagradal

Bændur og landeigendur segja Vegagerðina bera ábyrð á gríðarlegri fegurðarneyslu vegfarenda um dalinn

Nú er allt að gerast í samgönguráðuneytinu þar sem spekingurinn og mannvinurinn Jón Gunnarsson ræður ríkjum. Fyrir liggur krafa frá bændum og landeigendum í Fagradal á hendur Vegagerðinni sem þessir aðilar telja að hljóti að bera ábyrgð á gríðarlegri fegurðarneyslu vegfarenda um dalinn síðan Þjóðvegur 1 var lagður eftir endilöngum dalnum.

Krafan hljóðar upp á fegurðargjald pr. hvern ferðalag sem leggur leið sína eftir þjóðveginum um dalinn. Til málamiðlunar er fallist á að leyfa umferð fólksflutningabifreiða gegn því að ógegnsæ gluggatjöld verði dregin fyrir gluggana rútubíla með þeir eru á ferð um dalinn, en bílstjóra í akstri verði heimilt að horfa á veginn út um vinstri helming framrúðunnar og aðeins þurfi að myrkva hægri hluta hennar.

Sú lausn að byrgja glugga á rútum og einkabílum sem leggja leið sína um Fagradal gæti verið mjög kosnaðarsöm, þannig að hóflegt fegurðargjald væri í rauninni sparnaður til lengri tíma litið.

Talsmaður landeigenda í Fagradal, Gullveig Eiríksdóttir hreppstýra á Fögrumýri (sem áður hét Útirauðsmýri) bendir á að ekki er krafist afturvirkra bóta fyrir uppsafnaða ókeypis fegurðarneyslu frá fyrri tíð, þótt nú séu margir áratugir síðan vegarslóði var lagður um dalinn á ábyrgð Vegagerðarinnar.

Gullveig hreppstjóri (t.v. á myndinni) á Fögrumýri (áður Útirauðsmýri) segir fólk og fénað í Fagradal búinn að fá upp í kok af græðgislegri fegurðarneyslu vegfarenda.

„There is no such thing as a free lunch,“ segir Gullveig, „og náttúrufegurð eins og hérna í Fagradal sem er harðbýll og erfiður til búskapar er okkar eina auðlind meðan sumir aðrir bændur hafa  bæði dúntekju og reka og ferðamenn – og við trúum því ekki fyrr en við tökum á því að frjálshuga sjálfstæðismaður eins og samgönguráðherra ætli að gugna á að viðurkenna eignarrétt landeigenda á fegurðinni.“

Þér gæti einnig líkað við
Ummæli
Hleð...