FERMINGARGJÖFIN Í ÁR? HRÆGAMM Á HVERT HEIMILI!

Nýr hrægammasparibaukur eða jafnvel stærri útgáfa af hrægammabauknum sem hreinsaði sparifé stærri viðskiptavina frá alvöru fjárfestunum sem nú eiga Arionbanka gæti slegið í gegn sem fermingargjöfin í ár!

Snillingurinn Gunnar Karlsson gerir það ekki endasleppt. Á þessari fallegu mynd minnir hann okkur á að höfuðdyggð Íslinga hefur frá landnámstíð verið að sjá til þess að fjármunir lendi hjá þeim sem kunna með fé að fara og ekki hjá einhverjum aumingjum.

Á þessari mynd getur að líta ómótstæðilega fagran sparibauk í líki hrægamms eða alvörufjárfestis. Þetta er dýrgripur sem gæti í senn hvatt landsmenn til sparnaðar og um leið verið stórkostlegur listmunur sem mundi prýða hvert heimili og vera til marks um peningavit heimilisfólks.

Hinir nýju eigendur Arionbanka „alvöru fjárfestarnir“ langþráðu sem hinn fagurtyngdi bankastjóri Arion bauð svo innilega velkomna að veisluborðinu á Íslandi kunna þá ekki með fé að fara ef þeir setja Kínverja ekki í að framleiða sosum 100 þúsund eintök (fyrsta upplag) af þessum fallega hrægammasparibauk sem (skuldlausir) viðskiptavinir bankans gætu fengið að kaupa með 2,5% afslætti meðan aðrir yrðu að kaupa þennan dýrgrip á fullu verði.

Hér er komin fermingargjöfin í ár og það er næsta víst að þau börn sem ekki fá hrægammasparibauk frá Arionbanka í fermingargjöf gætu átt að hættu að verða fyrir aðkasti – jafnvel einelti – svo að allur er varinn góður. Hrægamm á hvert heimili!

Einnig mætti hugsa sér að láta framleiða stærri útgáfu af hrægammsbauknum fyrir stærri viðskiptavini, nokkurs konar þvottavél sem gæti hreinsað velkta eða skítuga peninga sem í hann væru látnir þannig að þeir yrðu aftur skínandi fagrir og nýstraujaðir eftir þvottinn.

Nú er bara að bíða eftir tilboði frá alvöru fjárfestunum:

„Einstakt tilboð:
Fyrsta næsta mánaðar geta menn komið með gömul fótanuddtæki í sérstaka sjálfsala sem settir verða upp í öllum útibúum Arionbanka og fengið 2 NÝJA hrægammsparibauka í staðinn!
Einnig verður hægt að semja um hrægammspeningaþvottavélar á raðgreiðslum.
Kjörorðið er HRÆGAMM Á HVERT HEIMILI!“

Þér gæti einnig líkað við
Ummæli
Hleð...