Nei, það verða hvorki sjóbirtingskrókódílar né ebóla-veirur til sýnis í Húsdýragarðinum á morgun heldur hafa þýski Íslandsvinabankinn Hauck & Aufhäuser, Arionbanki, bandaríska fjármála- og menningarstofnunin The Goldman Sachs Group og Samtök íslenskra stjörnulögmanna  ákveðið að færa Húsdýragarðinum eða öllu heldur íslensku þjóðinni höfðinglega gjöf sem verður afhjúpuð í dag, laugardag, kl. tvö og verða léttar veitingar og að sjálfsögðu frír aðgangur milli kl. 13 og 16 og ókeypis hádegisverður að auki.

Það eru hvorki meira né minna en þrír lifandi hrægammar sem gefendur munu formlega afhenda kl. 13.30 á morgun og fjármálaráðherra tekur við þessari rausnarlegu gjöf fyrir hönd íslenska ríkisins.

Hrægammarnir verða til sýnis í Húsdýragarðinum í rammgerðu búri og eru gestir beðnir að gæta sín að koma ekki nærri girðingunni, því að hér er um að ræða grimmustu og hættulegustu lífverur á jörðinni með allri virðingu fyrir sjóbirtings krókódílnum sem lifir mest á hákörlum og ebóla-veirunni, þannig að betra er að fara varlega.

Hrægammar eru til af ýmsum stærðum og gerðum. Þær tegundir eða afbrigði sem Íslingar hafa nú eignast og geta skoðað í Húsdýragarðinum eru tvær og báðar þekktar fyrir að dýrin nálgast það með ótrúlegum hætti að geta tekið á sig mannsmynd án þess að hafa mannlegar tilfinningar, þannig að einungis dýrafræðingar geta greint þau frá venjulegu fólki: Kvendýrin, númer 2 og 3, eru af tegundinni „vulturus sapiens“ sem er sjaldgæfasta og verðmætasta afbrigði tegundarinnar en karldýrið er eintak af „vulturus vulgaris“ sem er mun útbreiddari tegund en ekki síður grimm og hættuleg.

Í ráði er að efna til samkeppni meðal gesta sem koma í Húsdýragarðinn um að finna viðeigandi nöfn á kvendýrin sem eru óskírð ennþá en karldýrið hefur hlotið nafnið ARION.