Miðaldir gætu hugsanlega hafist aftur á þessu kjörtímabili

Ekki aðeins jörðin sem er flöt heldur alheimurinn

Myndin hér fyrir ofan er af málverki frá hinum skemmtilegu miðöldum sem svo margir sakna. Hún er af málverki sem sýnir Heilagan anda við laxveiðar í Sumarlandinu ásamt hópi útvalinna íslenskra engla af báðum kynjum.“

Nú er Sjálfstæðisflokkurinn á ný orðinn stærsti stjórnmálaflokkur landsins eins og var á fyrri tíð meðan fátæklingar voru fátæklingar og harðánægðir með það og ekki með neitt röfl út af því að betra fólk af góðum ættum hefði það skárra en lúsugur almúginn. En það eru fleiri gleðileg teikn á lofti. Systurflokkur Sjálfstæðisflokksins í Bandaríkjunum sem er reyndar mun frjálslyndari og víðsýnni en íslenska íhaldið hefur nú eignast sinn forseta í Hvíta húsinu þar sem Dubya Bush varð fyrstur allra forseta til hitta á að hafa nákvæmlega sömu greindarvísitölu og sá stofuhiti sem tíðkast á Ávölu skrifstofunni í Hvítahúsinu en greindarvísitala núverandi forseta er talin vera ennþá „svalari“.

Núverandi forseti Donald Trump hefur komið allri heimsbyggðinni á óvart með hugmyndum sínum og framgöngu og allir sannir íhaldsmenn gleðjast bæði hátt og í hljóði.

Þessi mynd sýnir hvernig jörðin mun líta út eftir að nýmiðaldir hefjast; flöt eins og lumma eða pönnukaka og svífur um geiminn á bakinu á risaskjaldböku.

Það er líka eggjahljóð í sérfræðingum og besservisserum víðsvegar um heimsbyggðina enda talið næsta víst að hinar vinsælu miðaldir sem í óþökk margra urðu að víkja fyrir svokölluðum nútíma muni hefjast aftur – og að sögn þeirra bjartsýnustu gætu nýmiðaldir hafist jafnvel á yfirstandandi  kjörtímabili .

Stefnt verður að því að hinar vinsælu galdrabrennur sem svo margir sakna geti hafist aftur fljótlega eftir að miðaldir hefjast á ný og gengið hefur verið frá nauðsynlegum formsatriðum, enda er talið að þessi forna og skemmtilega hefð muni gera sig einstaklega vel sem fjölskylduefni í raunveruleikasjónvarpi. Sama gildir um trúarofsóknir sem raunveruleikasport. Að undanförnu hafa að vísu múslimaofsóknir staðið með talsverðum blóma, en margir spyrja hvort það sé sanngjarnt og standist jafnræðisreglu að taka músílmenn framfyrir aðra nú  um stundir og hvort önnur trúarbrögð eigi ekki að vera jafnrétthá þegar kemur að ofsóknum?

Á hinum nýju miðöldum verður m.a. boðið upp á það nýmæli að það sé ekki bara jörðin sem er flöt heldur alheimurinn líka eins og hann leggur sig, þetta einfaldar heimsmyndina til muna, þannig að hægt verður að stytta framhaldsskólanám og geta þeir sem kunna alla litlu margföldunartöfluna (raungreinanemendur) eða ljóðið „Sáuðið hana systur mína“ (hug-greinanemar) lokið stúdentsprófi á 6 mánuðum í góðum einkaskólum ef skólagjöld eru í skilum.

Þér gæti einnig líkað við
Ummæli
Hleð...