Skuggalegar afleiðingar þorrans að koma í ljós

Viðvörun um nokkuð sem ekki má nefna

Að loknum þorra hlýtur að mega nefna þá staðreynd að fjöldi íslenskra kvenna virðist hafa orðið fyrir pungeitrun á síðustu viku og er talið augljóst að taumlaust hrútspungaát á þorra hafi haft eitrunaráhrif á einhvern hluta íslenska kvennastofnsins.

Eitrunaráhrifin lýsa sér í ranghugmyndum og stórmennskudraumum þannig að og fleiri og fleiri konur koma nú út úr skápnum og fullyrða að það sé þeirra æðsti draumur að vakna með stóran pung, helst súran, og telja að „með pungum skuli land byggja“ og ef þeim yxi vænn pungur gætu þær klekkt á óvinum sínum með hrútskýringum og jafnvel sigrað feðraveldið illræmda sem hingað til hefur haft hreðjatak á Íslingum – lengst af undir firmanafninu LÍÚ.

Rannsóknir sýna að einungis konur hafa óþol fyrir hrússpungum en það hefur reyndar löngum verið vitað að íslenskir karlmenn geta etið næstum því hvaða óþverra sem er með góðri lyst og drukkið landa með án þess að verða meint af – utan það sem augljóst er þegar atgervi stofnsins er skoðað.
Leitað er nú dag og nótt að móteitri gegn þeim ranghugmyndum að pungar, og helst súrsaðir hrútspungar ágræddir, muni auka konum styrk og þrek í jafnréttisbaráttunni, en þangað til lækning hefur fundist er varað við þessu sem ekki má nefna á Facebook og þaðan af síður leggja sér til munns.

Þér gæti einnig líkað við
Ummæli
Hleð...